تقرير شامل عن لعبة Kill Zone 2 PS3

[mido 2020]

النهاردة أنا إن شاء الله , عامل تقرير عن لعبة Kill Zone 2 و طبعا اللعبة دى واحدة من أوراق شركة سونى لكسب سباق الكونسولز مع نينتندو Wii و مايكروسوفت X Box 360 .

اللعبة طبعا معروفة من PS2 وكان أول جزء ليها Kill Zone و بعد نجاح اللعبة , أتعمل جزء تانى بس على جهاز PSP و كان أسمه Kill Zone : Liberation , و أستكمالا لمبدء "السبوبة" عملو جزء تالت أسمة Kill Zone 2 .

و علشان الناس اللى بتهتم بموضوع القصة و ملعبتش الأجزاء اللى فاتت متتخضش و تنزل تشترى PS2 و PSP علشان تتابع اللعبة . القصة سهل جدا أنك تفهمها من Kill Zone 2 من غير ما تلعب باقى الأجزاء " شوف بقى يا عم أنا وفرت عليك كام بلكلمتين دول , أيدك بقى على 10% "...

المهم طبعا إن اللى لعب الأجزاء التانية هيبقى عنده خلفية عن الشخصيات و موضوع اللعبة .

طيب "ايه بقى الموضوع ؟؟ "

الناس فلمستقبل توسعت و بدئت تسكن كواكب تانية " و ساعتها حنكون أحنا لسة محشورين فل قاهرة برضو !! أيوة يا حبيبى متبصش على غيرك "

قررت الناس أنها تكون مجموعة دفاع كونى أسمها I.S.A و مقرها كوكب Vekta. فى كوكب أسمه Helghan و الكوكب ده الناس اللى ساكنة عليه على مر السنين و نتيجة الظروف البيئية الصعبة على الكوكب حصلها تشوهات و بقت أقوى و أسرع من الأنسان العادى , و عشان تقدر تعيش على الكوكب بتلبس المسكات الجميلة اللى فلصورة " متوفرة بجميع المقاسات و الألوان ما عدى اللون الفوحلقى لنفاذ الكمية " و أسمهم Helghast .

قائد Helghast أسمه Visari قرر أنه يحتل العالم و بدء بحرب مع I.S.A على كوكب Vekta .
و أنتهت الحرب بفوز I.S.A. و رجوع Helghast لكوكبهم " و يا دار ما دخلك شر "

تبدء من هنا قصتنا فى Kill Zone 2 و المشهد الأفتتاحى لراجل " ما شاء الله واكل أكل إخواتو التسعة ده إن ماكنش أكلهم شخصيا !! "

طب السؤال المهم هنا , ليه أختارو الراجل ده للمقدمة

أ – علشان شكله حلو " لأ طبعا , لأن وشه يقطع الخميرة من البيت "
ب – لأنهم كانو مازنوقين فكومبرس " لأ برضه "
ج – لأنه Visari قائد الhelghast " برافو عليك , تنفع جيمر "

المقدمة لVisari و هو بيلعن أستعداده للدفاع عن كوكب Helghan من هجوم الI.S.A .

حضرتك حتلعب بSev و هو واحد من فريق Alpha Squad المكون من أربع جنود و مهمتك أنك توصل لVisari و تقبض عليه " و خالتى و خالتك و أتفرقو الخالات " .


الجيم بلاى Game Play :

الكونترول فللعبة أوفر وهمى , الsenstivity عالية جدا و الmotion فاجيم سلس تماما لدرجة أنك حتنسى أنك بتلعب بلanalog .

فلone player حيبقى معاك شخصيات من الفريق بتساعدك و أنت بتلعب. الAI بتاع الشخصيات حيخليها تدافع عنك و أنت بتهجم Cover up و تقتل معاك الوحوش و هى بتهجم عليكو " بس طبعا حضرتك حتشيل نصيب الأسد فلموضوع , إنت راجل دافع برضو "

الAI بتاع الHelghast برضه مش سهل , الوحوش ليها طرق مختلفة فلهجوم و كل وحش ليه استراتجى معينة , ده غير انهم بيلعبو Team work مع بعض و عشان كده اللعبة حتحتاج منك شوية استراتجى لأنك مش حينفع تفتح صدرك و تخش فيهم عنتر شايل سيفه , لازم أنك تحتمى بأى حاجة وأنت بتحارب Take cover عشان تقلل نسبة الضرب .

الأسلحة جامدة جدا فللعبة , لكن و مع الأسف أنت مش حتقدر تشيل أكتر من سلاح واحد main و مسدس و خنجر و أربع قنابل " و قوم يا مصرى "

من الواقعية فللعبة أن الأسلحة وقت الreload بتعها بيختلف من سلاح للتانى على حسب نوع السلاح.

بتركب Robots و عربيات بس مش كتير , لكن التحكم فيهم واقعى جدا.

أستخدام الsix-axis فى اللعبة محدود و فحاجات مش مؤثرة فللعب " زرع قنابل مثلا "

من الحاجات برضه الجامدة أنك حتلعب فى ظروف مختلفة , يعنى حرب فى أرض مفتوحة و أحيانا تقع فى كمين و تبقى محاصر , أحيانا تتزنق فحتة ديقة و هاتك يا ضرب من كل حتة .


الجرافيكس Graphics :

منكم شاف الtrailer أو الجيم بلاى حيلاظ أن مستوى الواقعية فلتجسيم عالى جدا جدا , الأشخاص تفاصيلهم دقيقة و واضحة و إنفعلاتهم واقعية. أما بلنسبة للبيئة المحيطة فلصحرا ء و أنت بتلعب و الرمل بيحجب عنك الرؤية و الرصاص بيتضرب فلأرض أو على الأشياء , الناس و هى بتتصاب و تموت جنبك أو لما تضرب Flame thrower على خصم و تشوف التفاصيل و هو بينصهر. الجرافيكس حتنجح تماما أنها تدخلك فمود الجيم و تعيشك الأحداث فعلا .

الصوت Audio :

الأداء الصوتى فللعبة للشخصيات عامة عادى جدا , لكن الشخصية الوحيدة اللى صوتها فعلا قوى هو Visari " أيوة , هو اللى أنت أفتكرتو كومبرس فأول اللعبة "

الساوند إفكت و التراكات تشدك و أنت بتلعب و حتخليك ديما مترقب و قلقان ليكون الصوت جاى من حتة أنت مش شايفها .

النت ورك Network :

بصراحة أجمد نتورك لعبته فى شوتينج جيم لغاية النهاردة . الrooms كتير و مترتبة حسب الregion يعنى لو عايز تلاعب عرب يبقى تختار Middle East و لو عايز تلاعب أجانب يبقى Europe و هكذا.

الroom بتشيل لغاية 32 بلاير مقسمين على فريقين , ممكن تلعب كذا مود ذى death match أو فى مود جامد أسمه assassination و هو أن الكمبيوتر بيختار و احد من الفريقين يبقى الهدف و مطلوب من فريقه يحميه و من الفريق التانى يقتلو و فى كمان كذا مود تانى .

اللعبة واخدة متوسط 90% من أكتر من 60 ريفيو من مجلات PS3 .

الرأى الشخصى :

سونى و Guerilla بدائو جيل جديد من ألعاب first person shooter و نجحو فعلا فى أنهم يتميزو على كل ألعاب نفس الفئة فكل الأجهزة .

اللعبة دى لازم أى حد بيحب FPS يلعبها و فى رأى أن سونى بلجيم ده أخدت خطوة كبيرة فى أتجاه أنها تكون أفضل جيمينج كونسول.

أتمنى أنى مكنش طولت عليكو و أشوفكو فى تقرير تانى إن شاء الله .